సిద్దిపేట జిల్లా : సర్దార్ సర్వాయి పాపన్న గౌడ్ ఆశయ సాధనలో ప్రతి ఒక్కరు పయనించాలని గౌడ సంఘం మండల అధ్యక్షుడు చెప్యాల శ్రీనివాస్ గౌడ్ అన్నారు. బెజ్జంకి మండలకేంద్రంలో బహుజన పోరాట యోధుడు సర్దార్ సర్వాయి పాపన్న గౌడ్ 373వ జయంతిని శుక్రవారం గౌడ సంఘం నాయకులు ఘనంగా జరుపుకున్నారు. ఈ సందర్భంగా పాపన్న గౌడ్ చిత్రపటానికి పూలమాలలు వేసి, ఘనంగా నివాళులర్పించారు. అనంతరం గౌడ సంఘం నాయకులు మాట్లాడుతూ తెలంగాణ వీరత్వానికి ప్రతీకగా సర్వాయి పాపన్న గౌడ్ నిలుస్తారని అన్నారు. ఆనాటి సమాజంలో నెలకొన్న నిరంకుశ రాజరిక పోకడలకు వ్యతిరేకంగా సబ్బండ వర్గాలను ఏకం చేసి పాపన్న పోరాడిన తీరు గొప్పదన్నారు. అణచివేత, వివక్షకు వ్యతిరేకంగా పాపన్నగౌడ్ ప్రదర్శించిన ఆత్మగౌరవ పోరాట స్ఫూర్తి అందరికీ ఆదర్శనీయమన్నారు. పాపన్నకల్లుగీత వృత్తిని కొనసాగిస్తూనే భూస్వాములు, దేశముఖ్ ల దాష్టీకాలను ఎదిరించి పోరుబాట పట్టాడన్నారు. పాపన్న వీరత్వానికి గుర్తుగా లండన్ మ్యూజియంలో విగ్రహాన్ని ఉంచారని అన్నారు. ఈ కార్యక్రమంలో మండలంలోని వివిధ గ్రామాల గౌడ కులస్తులు పాల్గొన్నారు.
