మాసాయిపేట (తూప్రాన్): రాష్ట్ర అవతరణ తర్వాత కొత్తగా ఏర్పడిన మాసాయిపేట మండలం అన్ని రంగాల్లో రాణించాలని నర్సాపూర్ కాంగ్రెస్ ఇన్చార్జి ఆవుల రాజిరెడ్డి అన్నారు.
సమాజంలో క్రీడల ప్రాధాన్యతను పెంచడానికి ముఖ్యమంత్రి క్రీడల పట్ల ప్రత్యేక శ్రద్ధ వహించారని, అందుకు అక్షరాలుగా ఈ క్రీడా పోటీలు నిర్వహిస్తున్నారని చెప్పారు. మాసాయిపేట మండలంలోని స్థానిక ఉన్నత పాఠశాల ఆవరణలో 2024 CM Cup క్రీడా పోటీల ప్రారంభోత్సవానికి ముఖ్య అతిథిగా విచ్చేసిన రాజిరెడ్డి, జ్యోతి ప్రజ్వలన చేసి పోటీలను ప్రారంభించారు.
ఈ సందర్భంగా, రాజిరెడ్డి మాట్లాడుతూ, “మాసాయిపేట మండలం, జిల్లాలోని అన్ని మండలాలతో పోటీ పడుతూ అభివృద్ధి పథంలో ముందుకు సాగాలి. ఎన్నో వ్యయ ప్రయాసలకు తట్టుకొని ఈ స్థితికి వచ్చాం. గ్రామ స్థాయిలో ఉత్తమ క్రీడాకారులను వెలికితీసి, వారు శక్తివంతమైన క్రీడాకారులుగా ఎదగాలని కోరుకుంటున్నాం” అని అన్నారు.
ఈ పోటీల ద్వారా గ్రామస్థాయి క్రీడాకారులను గుర్తించేందుకు ప్రయత్నాలు జరుగుతాయని, ముఖ్యమంత్రి గారిచే ఈ కార్యక్రమం నిర్వహించబడుతోందని ఆయన తెలిపారు.
ఈ నెల 10 నుండి 12 వరకు జరిగే ఈ మండల స్థాయి క్రీడల్లో, మండలంలోని అన్ని గ్రామాల నుండి క్రీడాకారులు పాల్గొని విజయం సాధించాలని ఆయన పిలుపునిచ్చారు.
ఈ కార్యక్రమంలో, మండల ప్రత్యేక అధికారి రాకేష్ కుమార్, మండల అభివృద్ధి అధికారి ఉమా దేవి, మండల తహసీల్దార్ జ్ఞాన జ్యోతి, మండల విద్యాధికారి లీలావతి, స్థానిక ఉన్నత పాఠశాల ప్రధానోపాధ్యాయులు ధర్మపురి, పంచాయతీ కార్యదర్శులు, ఉపాధ్యాయులు, వ్యాయామ ఉపాధ్యాయులు శ్యామ్ సుందర్ శర్మ, నవీన్, కృష్ణ, కాంగ్రెస్ నాయకులు రాజిరెడ్డి, శ్రీకాంత నాగి రెడ్డి, మాజీ ఉపసర్పంచ్ నాగరాజు, మాజీ ఎంపిటిసి చెరుకు సిద్ధిరాములు గౌడ్, మాజీ ఎంపిటిసి కృష్ణారెడ్డి, వివిధ గ్రామాల నాయకులు పాల్గొన్నారు.
