గన్నేరువరం, కరీంనగర్ జిల్లా: కరీంనగర్ జిల్లా గన్నేరువరం మండలం చాకలివానిపల్లె గ్రామ పరిధిలోని కూనవానిపల్లెలో బతుకమ్మ పండుగ సందర్భంగా ఓ మహిళను బతుకమ్మ ఆడనివ్వకుండా అడ్డుకున్నారనే, అనంతరం ఆమె కుటుంబాన్ని కుల బహిష్కరణ చేశారనే ఆరోపణలు స్థానికంగా సంచలనం సృష్టించాయి. ఈ ఘటనపై బాధిత కుటుంబం పోలీసులను ఆశ్రయించగా, కేసు నమోదు చేసి దర్యాప్తు చేపట్టినట్లు సమాచారం.
బతుకమ్మ వేడుకల్లో అవమానం ఎదురైందని బాధితురాలి ఆరోపణ
గ్రామానికి చెందిన కూన భారతి, ఆమె భర్త మల్లయ్య కుటుంబం గ్రామంలోనే నివాసం ఉంటున్నారు. ఆదివారం బతుకమ్మ పండుగ సందర్భంగా భారతి సంప్రదాయం ప్రకారం బతుకమ్మను పేర్చి వేడుకల్లో పాల్గొనేందుకు వెళ్లగా, గ్రామానికి చెందిన కొందరు వ్యక్తులు అడ్డుకుని బతుకమ్మ ఆడనివ్వకుండా అవమానించారని ఆమె ఆరోపిస్తోంది. ఈ ఘటనతో తీవ్ర మనస్తాపానికి గురైన కుటుంబం అప్పటి నుంచి ఆవేదనలో ఉందని తెలిపింది.
ఐదు రోజులైనా నిమజ్జనం కాని బతుకమ్మ
సాధారణంగా బతుకమ్మను ఆడిన రోజే నిమజ్జనం చేయడం ఆనవాయితీ. అయితే అవమానంతో బాధపడిన కుటుంబం బతుకమ్మను నిమజ్జనం చేయకుండా గ్రామంలోని పెద్దమ్మ గుడి వద్దే ఉంచినట్లు తెలిసింది. గురువారం నాటికి ఐదు రోజులు గడిచినా బతుకమ్మ అక్కడే ఉండటం గ్రామంలో చర్చనీయాంశంగా మారింది. బాధితులు చూపిస్తున్న బతుకమ్మ అదే రోజున పేర్చినదేనని పేర్కొంటున్నారు.
భూ వివాదమే కారణమా?
కొద్ది రోజుల క్రితం భూ సమస్య విషయంలో రెండు కుటుంబాల మధ్య వివాదం జరిగినట్లు బాధితులు తెలిపారు. పెద్దల సమక్షంలో ఆ వివాదం పరిష్కారమైనప్పటికీ, ఇప్పటికీ తమపై కక్ష సాధింపు చర్యలు కొనసాగుతున్నాయని ఆరోపించారు. భూ వివాదాన్ని సాకుగా చూపి పండుగ రోజున కూడా తమను వేధిస్తూ, కుటుంబాన్ని కుల బహిష్కరణకు గురిచేస్తున్నారని వారు వాపోయారు.
పోలీసులకు ఫిర్యాదు.. కేసు నమోదు
ఈ ఘటనపై బాధిత కుటుంబం సోమవారం గన్నేరువరం పోలీస్ స్టేషన్‌లో ఫిర్యాదు చేసింది. ఫిర్యాదు ఆధారంగా పోలీసులు కేసు నమోదు చేసి దర్యాప్తు ప్రారంభించినట్లు సమాచారం. మహిళను బతుకమ్మ ఆడకుండా అడ్డుకోవడం, కుల బహిష్కరణ ఆరోపణలపై పోలీసులు వివిధ కోణాల్లో విచారణ చేపడుతున్నారు.
మహిళా సంఘాల ఆందోళన
ఆడబిడ్డల ఆత్మగౌరవానికి ప్రతీకగా భావించే బతుకమ్మ పండుగ రోజునే ఇలాంటి ఘటన చోటుచేసుకోవడం పట్ల మహిళా సంఘాలు తీవ్ర ఆందోళన వ్యక్తం చేస్తున్నాయి. బాధిత కుటుంబానికి న్యాయం చేయడంతో పాటు, ఘటనకు బాధ్యులపై చట్టపరమైన చర్యలు తీసుకోవాలని వారు డిమాండ్ చేస్తున్నారు.
