contact@thereportertv.com

THE REPORTER TV
THE REPORTER TV

______ We Report India ________

టాస్క్‌ఫోర్స్ సోదాలపై హైకోర్టు సీరియస్.. హోంశాఖ, డీజీపీకి నోటీసులు

హైదరాబాద్ టాస్క్‌ఫోర్స్ పోలీసులు చట్టబద్ధమైన నిబంధనలను పాటించకుండా సోదాలు, తనిఖీలు నిర్వహిస్తున్నారన్న ఆరోపణలపై తెలంగాణ హైకోర్టు తీవ్రంగా స్పందించింది. ఈ ఆరోపణలపై దాఖలైన రిట్ పిటిషన్‌ను విచారించిన న్యాయమూర్తి జస్టిస్ మాధవి దేవి రాష్ట్ర హోంశాఖ, డైరెక్టర్ జనరల్ ఆఫ్ పోలీస్ (డీజీపీ), హైదరాబాద్ పోలీస్ కమిషనర్‌తో పాటు టాస్క్‌ఫోర్స్ డీసీపీలకు నోటీసులు జారీ చేశారు. పిటిషన్‌లో చేసిన ఆరోపణలపై పూర్తి వివరాలతో వివరణ సమర్పించాలని ఆదేశించారు.

బోరబండకు చెందిన బి. బాలరాజ్ దాఖలు చేసిన రిట్ పిటిషన్‌లో టాస్క్‌ఫోర్స్ పోలీసులు చట్టపరమైన విధానాలను ఉల్లంఘిస్తున్నారని పేర్కొన్నారు. పోలీసు యూనిఫాం ధరించకుండా సాధారణ దుస్తుల్లో వచ్చి తనిఖీలు నిర్వహించడం, ఎలాంటి ఎఫ్‌ఐఆర్ నమోదు చేయకుండానే సోదాలు చేపట్టడం, వస్తువులను స్వాధీనం చేసుకోవడం వంటి చర్యలు చట్టవిరుద్ధమని కోర్టు దృష్టికి తీసుకెళ్లారు.

పిటిషనర్ తరఫు న్యాయవాది వాదనలు వినిపిస్తూ, భారతీయ నాగరిక భద్రతా సంహిత (BNSS)-2023 నిబంధనల ప్రకారం ఎఫ్‌ఐఆర్ నమోదు కాకముందే ఏకపక్షంగా దర్యాప్తు చేపట్టడం చట్టానికి విరుద్ధమని తెలిపారు. అలాగే సంబంధిత వ్యక్తులకు తమ వాదనలు వినిపించే అవకాశం ఇవ్వకుండా, పారదర్శకత లేకుండా వ్యవహరిస్తున్నారని కోర్టుకు వివరించారు.

సెర్చ్ వారెంట్లు జారీ చేసే అధికారం కేవలం జ్యుడీషియల్ మేజిస్ట్రేట్‌లకే ఉందని, అయితే ఏసీపీ స్థాయి అధికారులు సెర్చ్ వారెంట్లు జారీ చేస్తున్నారని పిటిషనర్ తరఫు న్యాయవాది అభ్యంతరం వ్యక్తం చేశారు. ఇది చట్టబద్ధమైన విధానాలకు విరుద్ధమని ఆయన వాదించారు.

పిటిషనర్ వాదనలను పరిశీలించిన హైకోర్టు, లేవనెత్తిన అన్ని అంశాలపై సమగ్ర వివరణ ఇవ్వాలని రాష్ట్ర ప్రభుత్వం, పోలీసు అధికారులను ఆదేశించింది. తదుపరి విచారణను డిసెంబరు నెలకు వాయిదా వేస్తూ కేసును కొనసాగించింది.

టాస్క్‌ఫోర్స్ పోలీసుల సోదాలు, తనిఖీల విధానంపై హైకోర్టు నోటీసులు జారీ చేయడం రాష్ట్ర పోలీసు వర్గాల్లో చర్చనీయాంశంగా మారింది. ఈ కేసులో ప్రభుత్వం, పోలీసు శాఖ సమర్పించే వివరణపై తదుపరి విచారణలో కీలక పరిణామాలు చోటుచేసుకునే అవకాశం ఉందని న్యాయవర్గాలు అభిప్రాయపడుతున్నాయి.

Facebook
Twitter
WhatsApp
Telegram
Email

   TOP NEWS  

   Related News  

Live Sports  

 Don't Miss this News !

Share :