కాంగ్రెస్ అగ్రనేత రాహుల్ గాంధీ చేపట్టిన భారత్ జోడో న్యాయ్ యాత్ర ముగింపు సభ ముంబయిలో నిర్వహిస్తున్న విషయం తెలిసిందే. అయితే.. ఈ సభకు హాజరయ్యేందుకు హైదరాబాద్ నుంచి సీఎం రేవంత్ రెడ్డి.. విమానంలో బయలుదేరగా.. టేకాఫ్ అయిన కాసేపట్లోనే ఎమెర్జెన్సీ ల్యాండింగ్ చేశారు. ఈ విమానం టేకాఫ్ అయిన కాసేపటికే.. సాంకేతిక లోపం తలెత్తటంతో.. మళ్లీ వెంటనే శంషాబాద్‌ విమానాశ్రయంలో ఎమర్జెన్సీ ల్యాండింగ్ చేయాల్సి వచ్చింది. ఈ సాంకేతిక సమస్య కారణంగా వీరి ముంబయి ప్రయాణం దాదాపు గంటన్నర పాటు ఆలస్యమైనట్లు తెలుస్తోంది.
మధ్యాహ్నం సుమారు రెండున్నర సమయంలో ఇండిగో విమానంలో సీఎం రేవంత్ రెడ్డితో పాటు డిప్యూటీ సీఎం భట్టి విక్రమార్క, మంత్రి పొన్నం ప్రభాకర్, తెలంగాణ కాంగ్రెస్ ఇంఛార్జ్ దీప్ దాస్ మున్షీ.. అందరూ కలిసి వెళ్లాల్సి ఉంది. అయితే.. సీఎం రేవంత్ రెడ్డి సహా మిగతా నేతలంతా ముంబయికి వెళ్లాల్సిన ఇండిగో విమానంలో కూర్చోగా.. టేకాఫ్ అయింది. టేకాఫ్ అయిన కొద్దిసేపటికే సాంకేతిక లోపం కారణంగా ఇంజన్‌ వేడెక్కడం గమనించిన పైలట్‌.. వెంటనే అధికారులకు సమాచారం ఇచ్చి విమానాన్ని ఎమెర్జెన్సీ ల్యాండింగ్ చేశారు. దీంతో.. పెద్ద ప్రమాదమే తప్పినట్టయింది.
అయితే.. ఎయిర్ పోర్ట్ అధికారులు విమానాన్ని సిద్ధం చేసేవరకు.. సీఎం రేవంత్ రెడ్డి సహా మిగతా పెద్దలు ఎయిర్ పోర్టులోనే వేచి ఉండాల్సి వచ్చింది. సుమారు గంటన్నర తర్వాత మరమ్మతులు పూర్తవ్వడంతో.. విమానం ముంబయికి బయలుదేరింది.
