హైదరాబాద్: సీనియర్ ఐపీఎస్ అధికారి నవీన్ కుమార్ ను సిసిఎస్ పోలీసులు బుధవారం అదుపులోకి తీసుకున్నారు. విశ్రాంత ఐఏఎస్ భన్వర్ లాల్ ఫిర్యాదు మేరకు నీవన్ పై కేసు నమోదు చేశారు. భన్వర్ లాల్ ఇంట్లో నవీన్ కుమార్ అద్దెకు ఉంటున్నాడు. ఇల్లు ఖాళీ చేయకుండా కబ్జాకు ప్రయత్నిస్తున్నారని భన్వర్ లాల్ ఫిర్యాదులో పేర్కొన్నారు. నకిలీ దస్త్రాలతో ఇల్లు కబ్జాకు యత్నిస్తున్నారని నవీన్ పై ఆరోపణలు ఉన్నాయి.
నవీన్ కుమార్ తాను ఎలాంటి తప్పు చేయలేదని ఆవేదన వ్యక్తం చేశారు. ఈ కేసు కోర్టు పరిధిలో ఉన్నట్లు తెలిపారు. సివిల్ మ్యాటర్ పైన పోలీసులు కేసు నమోదు చేసినట్లు తెలిపారు. ఈ రోజు తనను వివరాల కోసం పోలీసులు పిలిచారని… తన వద్ద ఉన్న సమాచారాన్ని అంతటినీ వారికి ఇచ్చానని వెల్లడించారు. మూడేళ్లుగా అంటే 2020 నుంచి ఈ వివాదం నడుస్తున్నట్లు చెప్పారు. రేపు అన్ని వివరాలను వెల్లడిస్తామని.. న్యాయపరంగా ముందుకు వెళ్తానన్నారు. కాగా, ప్రస్తుతం తెలంగాణ పోలీసు అకాడమీలో జాయింట్ డైరెక్టర్ గా నవీన్ కుమార్ విధులు నిర్వహిస్తున్నారు
