పిఠాపురం : పిఠాపురానికి చెందిన ప్రముఖ కవి, వజ్రాయుధ కవిగా పేరుగాంచిన ఆవంత్స సోమసుందర్‌ శత జయంతి వేడుకలు స్థానిక సూర్యారాయ గ్రంథాలయం నందు పిఠాపురం సహృదయ మిత్రమండలి ఆధ్వర్యంలో ఘనంగా నిర్వహించారు. సహృదయ మిత్రమండలి అధ్యక్షుడు తోట శ్రీనివాస్‌ మరియు శ్రీకృష్ణదేవరాయ, ప్రముఖ కవి మేక మన్మధ రావు, సహృదయం మిత్రమండలి ప్రధాన కార్యదర్శి సి.హెచ్‌.సతీష్‌, భాష్యం స్కూల్‌ ప్రిన్సిపాల్‌ పొలపర్తి వేణు మరియు విద్యార్ధిని విద్యార్థులు, పట్టణ ప్రజలు పాల్గొన్నారు. ఈ కార్యక్రమంలో పాల్గొన్న వారికి ఆయన జయంతి సంధర్భంగా స్వీట్లు పంపిణీ చేశారు. అనంతరం ప్రముఖులు మాట్లాడుతూ వజ్రాయుధకవి స్పృసించని అంశం లేదని, సమాజ హితవు కోరి యువకులలో ఉద్యమ స్పూర్తి నింపే రచనలు అనేకం చేసారని, భాషాభిమానాన్ని తెలుగు వారు పెంచుకోవాలని, వారి రచనలు చదవాలని కోరారు. ప్రముఖంగా తెలంగాణ ప్రాంత ప్రజల కోసం నైజమ్‌ నవాబును ఎదిరించి రచనలు చేశారని కొనియాడారు. అంత గొప్ప వ్యక్తి పిఠాపురానికి చెందిన వారు కావడం మన అదృష్టమని, వారి స్ఫూర్తిని భవిష్యత్‌ తరాలకు అందించే ఉద్దేశంతో ప్రతి సంవత్సరము ఆయన జన్మదిన వేడుకలను ఘనంగా నిర్వహిస్తున్నామని సహృదయ మిత్రమండలి ప్రతినిధులు తెలియజేశారు.
