కరీంనగర్ జిల్లా: సైదాపూర్- ఆకునుర్ ఉన్నత పాఠశాలలో వ్యాయామ ఉపాధ్యాయునిగా భక్తు రాజ్ కుమార్ చేసిన క్రీడా సేవలు అభినందనీయమని తెలంగాణ సిపిఎస్ ఉద్యోగుల సంఘం రాష్ట్ర ప్రధాన కార్యదర్శి హన్మoడ్ల భాస్కర్ అన్నారు. మండలంలోని ఆకునూర్ ఉన్నత పాఠశాలలో పిఈటీ గా పనిచేసి కేశవపట్నం ఉన్నత పాఠశాలలో పీడీగా ప్రమోషన్ పొందిన భక్తు రాజ్ కుమార్ ను బుధవారం ప్రధానోపాధ్యాయులు బొట్ల రామస్వామి తో కలిసి హన్మాoడ్ల భాస్కర్ శాలువాతో ఘనంగా సన్మానించారు. అనంతరం హన్మoడ్ల భాస్కర్ మాట్లాడుతూ విద్యార్థులను వాలీబాల్ లో రాష్ట్ర స్థాయి క్రీడాకారులుగా తీర్చిదిద్దడంలో రాజ్ కుమార్ అహర్నిశలు కృషి చేశారని కొనియాడారు. క్రీడలతోపాటు విద్యార్థులకు సాంఘిక శాస్త్రం గణిత శాస్త్రాలను కూడా బోధించి విద్యార్థులకు విద్యాబుద్ధులు నేర్పారని అన్నారు. క్రీడలతోపాటు చదువు నేర్పించి విద్యార్థుల మనసులో చిరస్థాయిగా నిలిచిపోయారని అన్నారు. ఒకప్పుడు ఆకునూరులో వాలీబాల్ ఆట అంటే తెలియని స్థితి నుండి వాలీబాల్ వేసవికాలం శిక్షణ శిబిరాలను నిర్వహించి విద్యార్థులను రాష్ట్రస్థాయి క్రీడాకారులుగా ఎదుగుటకు దోహదపడ్డారని అన్నారు. గత సంవత్సరం ఎస్ జి ఎఫ్ వాలీబాల్ ఉమ్మడి జిల్లా స్థాయి టౌర్నమెంటును మారుమూల ప్రాంతమైన ఆకునూరులో నిర్వహించి విద్యార్థుల్లో క్రీడా స్ఫూర్తిని నింపారని అన్నారు. క్రమశిక్షణతో విద్య అయిన క్రీడల్లో అయినా రాణిస్తారని ఆ దిశగా విద్యార్థుల్లో క్రమశిక్షణ స్ఫూర్తికి కృషి చేశారని అన్నారు. ఈ కార్యక్రమంలో ప్రధానోపాధ్యాయులు బొట్ల రామస్వామి, ఉపాధ్యాయులు శాంత కుమార్ సింగ్, బైరి సుధాకర్, గూడూరి రవీందర్ రెడ్డి, గోదారి సమ్మయ్య, హరియ నాయక్, భక్తు రాజకుమార్, పోగుల విజయ్ కుమార్,రామలక్ష్మి తదితరులు పాల్గొన్నారు.
