మదనపల్లె ఆర్డీవో కార్యాలయంలోని సబ్ కలెక్టరేట్ లో జరిగిన అగ్నిప్రమాదంపై క్షేత్రస్థాయిలో పరిశీలన అనంతరం ఏపీ డీజీపీ ద్వారకా తిరుమలరావు మీడియా ముందుకు వచ్చారు.
గత రాత్రి 11.30 గంటలకు ఈ ఘటన జరిగిందని వెల్లడించారు. మూడు గంటల పాటు ప్రమాద స్థలాన్ని పరిశీలించామని చెప్పారు. కీలక ఫైల్స్ ఉన్న విభాగంలో ఈ అగ్నిప్రమాదం జరిగిందని తెలిపారు.
మదనపల్లె ఘటన ప్రమాదవశాత్తు జరిగినట్టు కనిపించడంలేదని, ఈ ఘటనపై పలు అనుమానాలు ఉన్నాయని అన్నారు. సబ్ కలెక్టర్ కార్యాలయంలో ఓల్టేజిలో హెచ్చుతగ్గులు లేవని, షార్ట్ సర్క్యూట్ కు అవకాశమే లేదని స్పష్టం చేశారు. కార్యాలయం కిటికీ వెలుపల కొన్ని అగ్గిపుల్లలు కనిపించాయని వెల్లడించారు. అదే సమయంలో ఈ కార్యాలయంలో కొన్ని సీసీ కెమెరాలు పనిచేయడంలేదని తెలిపారు.
జరిగిన ఘటన యాక్సిడెంట్ కాదు… ఇన్సిడెంట్ అని అర్థమవుతోందని… ఈ ఘటనపై ఎస్పీ, డీఎస్పీలకు స్థానిక సీఐ సమాచారం ఇవ్వకపోవడం పలు అనుమానాలకు తావిస్తోందని డీజీపీ పేర్కొన్నారు. ఆర్డీవో కూడా కలెక్టర్ కు సమాచారం ఇవ్వలేదని తెలిపారు. ఈ ఘటనలో కొందరు రెవెన్యూ, పోలీసు అధికారుల అలసత్వం కనిపిస్తోందని, సమగ్ర విచారణ జరగాల్సి ఉందని అన్నారు.
ఈ ఘటనను ప్రభుత్వం, పోలీస్ డిపార్ట్ మెంట్ తీవ్రంగా పరిగణిస్తోందని డీజీపీ స్పష్టం చేశారు. దర్యాప్తు కోసం 10 బృందాలను ఏర్పాటు చేశామని చెప్పారు. త్వరలో అన్ని వివరాలు బయటికి వస్తాయని పేర్కొన్నారు.
