ఒంగోలు: ప్రజల భద్రత, శాంతి సాధనలో పోలీసులు అహర్నిశలు కష్టపడి విధులు నిర్వహిస్తున్న విషయం తెలిసిందే. ఈ క్రమంలో, శనివారం ఒంగోలులోని జిల్లా పోలీస్ కార్యాలయంలో దుర్గామాత అమ్మవారి ఆశీస్సులతో జిల్లా ఎస్పీ సతీసమేతంగా ప్రత్యేక పూజలు నిర్వహించారు. విజయదశమి పండుగ సందర్భంగా అందరికీ శుభాకాంక్షలు అందిస్తూ, ఆయుధపూజను తెలుగు సంప్రదాయ దుస్తులు ధరించి, వేద మంత్రాల మధ్య శాస్త్రోక్తంగా నిర్వహించారు.
ఈ సందర్భంగా ఎస్పీ మాట్లాడుతూ, పోలీసులకు ఆయుధాలతో ప్రత్యేక అనుబంధం ఉందని, ప్రతి పోలీసు అధికారి ఆయుధాన్ని గౌరవించాలి అని అన్నారు. “మనం ఉపయోగించే వాహనాలు కూడా సమానంగా ప్రాధాన్యం కలిగి ఉంటాయి” అని ఆయన పేర్కొన్నారు. అందుకే ప్రతి సంవత్సరం విజయదశమి సందర్భం గా ఆయుధపూజ జరపడం ఎంతో ముఖ్యమని ఆయన వెల్లడించారు.
పోలీసు శాఖలో పదోన్నతి పొందిన ఆర్ఎస్సైలు ఓ.రవి కుమార్, శివ రామకృష్ణ ప్రసాద్ ను జిల్లా ఎస్పీ అభినందించారు. “పదోన్నతి పెద్ద విషయమే, ఇది మీ బాధ్యతలను మరింత పెంచుతుంది” అని ఆయన సూచించారు.
ఈ కార్యక్రమంలో అడిషనల్ ఎస్పీ (అడ్మిన్) కె. నాగేశ్వర రావు, ఎఆర్ అడిషనల్ ఎస్పీ అశోక్ బాబు, ఒంగోలు డిఎస్పీ ఆర్. శ్రీనివాసరావు, తదితర పోలీసు అధికారులు పాల్గొన్నారు.
పోలీసుల విధుల నిర్వహణలో శాంతి, భద్రతల పరిరక్షణ సాధించాలని, జిల్లా పోలీసు శాఖ అన్ని విషయాల్లో విజయవంతంగా ముందుకు సాగాలని జిల్లా ఎస్పీ ఆశించారు.
