అనంతపురం జిల్లా యాడికి మండలం తూట్రాళ్లపల్లి గ్రామంలో మాదిగ స్టూడెంట్ ఫెడరేషన్ (MSF) గ్రామ నూతన కమిటీని ఏకగ్రీవంగా ఏర్పాటు చేశారు. ఈ కార్యక్రమం పద్మశ్రీ మందకృష్ణ మాదిగ ఆదేశాల మేరకు, మహాజన సోషలిస్ట్ పార్టీ జాతీయ అధికార ప్రతినిధి వై.కె. విశ్వనాథ్ మాదిగ, అనంతపురం జిల్లా ఇన్‌చార్జి చిన్న సుబ్బారావు మాదిగ సూచనలతో నిర్వహించినట్లు నిర్వాహకులు తెలిపారు.
ఈ సందర్భంగా మహాజన సోషలిస్ట్ పార్టీ యాడికి మండల కన్వీనర్ లింగాల చిన్నగురప్ప మాదిగ మాట్లాడుతూ, ఎస్సీ ఉపవర్గీకరణ సాధన కోసం మందకృష్ణ మాదిగ నాయకత్వంలో మూడు దశాబ్దాలకు పైగా సాగిన ఉద్యమం చారిత్రాత్మకమని అన్నారు. ఉపవర్గీకరణ కోసం జరిగిన దీర్ఘకాల పోరాటంలో ప్రాణత్యాగం చేసిన మాదిగ అమరవీరుల సేవలను ఎప్పటికీ మరువలేమని పేర్కొన్నారు.
మాదిగ రిజర్వేషన్ పోరాట సమితి (ఎంఆర్పీఎస్) స్థాపన నుంచి ఉపవర్గీకరణే లక్ష్యంగా నిరంతర పోరాటం సాగిందని, ఆ ఉద్యమం ఫలితంగా మాదిగ సమాజంలో ఆత్మగౌరవ భావన మరింత బలపడిందని ఆయన తెలిపారు. గతంలో కుల గుర్తింపును చెప్పుకోవడానికే వెనుకంజ వేసే పరిస్థితి ఉండేదని, అయితే మందకృష్ణ మాదిగ నాయకత్వం వల్ల నేడు “నేను మాదిగను” అని గర్వంగా చెప్పుకునే స్థాయికి సమాజం చేరుకుందని వ్యాఖ్యానించారు.
నూతనంగా ఎంఎస్‌ఎఫ్‌లో చేరిన విద్యార్థులు చదువుతో పాటు సామాజిక చైతన్యాన్ని పెంపొందించుకోవాలని, ఎస్సీ ఉపవర్గీకరణ ద్వారా లభించే అవకాశాలపై ప్రతి మాదిగ విద్యార్థికి అవగాహన కల్పించాలని ఆయన పిలుపునిచ్చారు. విద్య ద్వారా అభివృద్ధి సాధించడంతో పాటు సమాజానికి సేవ చేసే దిశగా యువత ముందుకు రావాలని సూచించారు.
ఈ కార్యక్రమంలో మహాజన సోషలిస్ట్ పార్టీ యాడికి మండల కన్వీనర్ లింగాల చిన్నగురప్ప మాదిగతో పాటు ఇంటర్, డిగ్రీ చదువుతున్న మాదిగ విద్యార్థులు, ఎంఆర్పీఎస్ సీనియర్ నాయకులు, పార్టీ కార్యకర్తలు మరియు గ్రామస్థులు పాల్గొన్నారు. నూతన కమిటీ సభ్యులు సంఘాన్ని గ్రామస్థాయిలో మరింత బలోపేతం చేస్తూ విద్యార్థుల్లో విద్యా చైతన్యం, సామాజిక అవగాహన పెంపొందించేందుకు కృషి చేస్తామని తెలిపారు.
