పాకాల : తిరుపతి జిల్లా పాకాల మండలం మద్దినేనిపల్లి గ్రామ పంచాయతీలో పోలింగ్ సందర్భంగా ఉద్రిక్త పరిస్థితులు నెలకొన్నాయి. బూత్ నంబర్లు 9, 10లో రిగ్గింగ్ జరుగుతోందని ఆరోపిస్తూ స్థానిక ఓటర్లు పోలింగ్ ప్రక్రియపై తీవ్ర అభ్యంతరం వ్యక్తం చేశారు.
పోలింగ్ కేంద్రాల్లో అక్రమాలు జరుగుతున్నాయని ఆరోపించిన పలువురు ఓటర్లు పోలింగ్‌ను బహిష్కరించి కేంద్రం ఎదుటే ధర్నాకు దిగారు. తమ ఫిర్యాదులను ఎన్నికల అధికారులు పరిశీలించి తగిన చర్యలు తీసుకునే వరకు ఓటు వేయబోమని వారు స్పష్టం చేసినట్లు సమాచారం.
ఈ ఘటనతో కొంతసేపు పోలింగ్ కేంద్రాల వద్ద ఉద్రిక్త వాతావరణం నెలకొంది. విషయం తెలుసుకున్న పోలీసులు వెంటనే సంఘటనా స్థలానికి చేరుకుని పరిస్థితిని సమీక్షించారు. నిరసన వ్యక్తం చేస్తున్న ఓటర్లతో మాట్లాడి సమస్యను తెలుసుకునే ప్రయత్నం చేశారు.
పోలింగ్ కేంద్రాల వద్ద ఎలాంటి అవాంఛనీయ ఘటనలు చోటుచేసుకోకుండా అదనపు బందోబస్తు ఏర్పాటు చేసి పరిస్థితిని అదుపులోకి తీసుకువచ్చారు. ఎన్నికల ప్రక్రియ ప్రశాంతంగా కొనసాగేందుకు అధికారులు అవసరమైన చర్యలు చేపట్టారు.
అయితే రిగ్గింగ్ ఆరోపణలపై ఎన్నికల అధికారుల నుంచి అధికారిక ప్రకటన వెలువడాల్సి ఉంది. అధికారులు విచారణ చేపట్టి వాస్తవాలను నిర్ధారించే అవకాశం ఉందని సమాచారం.
