గోదావరిఖని, పెద్దపల్లి జిల్లా: గోదావరిఖని పారిశ్రామిక ప్రాంతంలో ఉపాధ్యాయుడిగా వేలాది మంది విద్యార్థుల జీవితాలను తీర్చిదిద్దిన సీనియర్ విద్యావేత్త, బీఆర్ఎస్ నాయకుడు, ఈశ్వర కృప వృద్ధాశ్రమ వ్యవస్థాపక అధ్యక్షుడు పి.టి. స్వామి శనివారం కన్నుమూశారు. ఆయన ఆకస్మిక మృతితో గోదావరిఖని ప్రాంతంలో తీవ్ర విషాదం నెలకొంది.
సమాచారం ప్రకారం, పెద్దపల్లి జిల్లా కేంద్రం నుంచి గోదావరిఖనికి తిరిగి వస్తుండగా బసంత్‌నగర్ సమీపంలో ఆయన ప్రయాణిస్తున్న కారు రోడ్డు ప్రమాదానికి గురైంది. ప్రమాదం జరిగిన వెంటనే ఆయనకు గుండెపోటు వచ్చినట్లు తెలిసింది. తీవ్ర అస్వస్థతకు గురైన స్వామిని వెంటనే గోదావరిఖని ప్రభుత్వ జనరల్ ఆసుపత్రికి తరలించి చికిత్స అందించినప్పటికీ వైద్యుల ప్రయత్నాలు ఫలించక ఆయన మృతి చెందారు.
పి.టి. స్వామి ఉపాధ్యాయుడిగా అనేక మంది విద్యార్థులకు విద్యాబుద్ధులు నేర్పి, వారి భవిష్యత్తుకు బాటలు వేసిన గురువుగా మంచి గుర్తింపు పొందారు. పేద విద్యార్థుల విద్యాభివృద్ధికి నిరంతరం కృషి చేస్తూ వారికి అండగా నిలిచారు.
సామాజిక సేవలో భాగంగా ఈశ్వర కృప వృద్ధాశ్రమం స్థాపించి నిరాశ్రయులు, వృద్ధులకు ఆశ్రయం కల్పిస్తూ సేవా కార్యక్రమాలు నిర్వహించారు. వృద్ధుల సంక్షేమం కోసం అంకితభావంతో పనిచేస్తూ సేవామూర్తిగా గుర్తింపు పొందారు.
విద్యారంగంతో పాటు సామాజిక, రాజకీయ రంగాల్లోనూ చురుకుగా వ్యవహరించిన స్వామి, బీఆర్ఎస్ నాయకుడిగా ప్రజా సమస్యల పరిష్కారానికి కృషి చేశారు. గురువుగా, సేవాభావం కలిగిన నాయకుడిగా, వృద్ధాశ్రమ వ్యవస్థాపకుడిగా ఆయన చేసిన సేవలు చిరస్మరణీయమని పలువురు కొనియాడుతున్నారు.
పి.టి. స్వామి మృతి పట్ల పూర్వ విద్యార్థులు, సామాజిక సేవకులు, రాజకీయ నాయకులు, అభిమానులు తీవ్ర దిగ్భ్రాంతి వ్యక్తం చేశారు. ఆయన కుటుంబ సభ్యులకు ప్రగాఢ సానుభూతి తెలుపుతూ, విద్యారంగానికి, సామాజిక సేవా రంగానికి ఆయన మరణం తీరని లోటని పేర్కొన్నారు.
