పల్నాడు జిల్లా – మాచర్ల : పల్నాడు జిల్లా ఈపూరు మండలం వనికుంట గ్రామానికి చెందిన అంగజాల ఆంజనేయులు తన భూమి జాతీయ రహదారి (ఎన్‌హెచ్-565) విస్తరణలో సేకరించబడినందుకు తగిన నష్టపరిహారం అందించాలని కోరుతూ చేసిన వినతిపై రెవెన్యూ అధికారులు క్షేత్రస్థాయిలో పరిశీలన చేపట్టారు.
ఆంజనేయులు తెలిపిన వివరాల ప్రకారం, మాచర్ల మండలం కొత్తపల్లి గ్రామ పరిధిలోని సర్వే నంబర్ 259-3A1లో తనకు 0.63 సెంట్ల భూమి ఉందని, అందులో 0.14 సెంట్ల భూమిని ఎన్‌హెచ్-565 రహదారి నిర్మాణం కోసం సేకరించినట్లు పేర్కొన్నారు. అయితే ఇప్పటివరకు ఆ భూమికి సంబంధించిన నష్టపరిహారం అందలేదని, అందువల్ల తగిన పరిహారం మంజూరు చేయాలని కోరుతూ గురజాల రెవెన్యూ డివిజనల్ అధికారికి (ఆర్‌డీఓ) అర్జీ సమర్పించారు.
ఈ వినతిపై స్పందించిన రెవెన్యూ అధికారులు సోమవారం సంబంధిత భూమిని ప్రత్యక్షంగా పరిశీలించారు. మాచర్ల తహసీల్దార్, మండల సర్వేయర్, కొత్తపల్లి గ్రామ రెవెన్యూ అధికారి సంయుక్తంగా భూమిని సందర్శించి సర్వే నిర్వహించారు. భూమి విస్తీర్ణం, రికార్డులు, క్షేత్రస్థాయి పరిస్థితులను పరిశీలిస్తూ వివరాలను నమోదు చేశారు.
ఈ సందర్భంగా అధికారులు మాట్లాడుతూ, రెవెన్యూ రికార్డులు, అర్జీదారు సమర్పించిన దస్తావేజులు మరియు ఇతర సంబంధిత ఆధారాలను పూర్తిగా పరిశీలించిన అనంతరం సమగ్ర నివేదికను సిద్ధం చేసి గురజాల ఆర్‌డీఓకు సమర్పిస్తామని తెలిపారు. ఆ నివేదిక ఆధారంగా తదుపరి నిర్ణయం తీసుకోనున్నట్లు వెల్లడించారు.
భూ సేకరణకు సంబంధించిన సమస్యలకు త్వరితగతిన పరిష్కారం లభించాలని స్థానికులు, భూ యజమానులు ఆశాభావం వ్యక్తం చేస్తున్నారు.
