- వి. సుధాకర్, సీనియర్ క్రైమ్ ఇన్వెస్టిగేటివ్ జర్నలిస్ట్ & చీఫ్ ఎడిటర్, రిపోర్టర్ టీవీ
జమ్మూకశ్మీర్లో ఇటీవల జరిగిన లష్కరే తోయిబా (LeT) కమాండర్ లతీఫ్ భట్ ఎన్కౌంటర్ సాధారణ ఉగ్రవాద వ్యతిరేక ఆపరేషన్గా మాత్రమే చూడలేం. ఇది భారత భద్రతా వ్యవస్థలో గత కొన్నేళ్లుగా నిశ్శబ్దంగా జరుగుతున్న వ్యూహాత్మక మార్పుకు ప్రతీకగా నిలుస్తోంది. ఒకప్పుడు ఉగ్రదాడి జరిగిన తర్వాత స్పందించే విధానంలో పనిచేసిన భద్రతా బలగాలు, ఇప్పుడు ముందస్తు నిఘా, సమన్వయం, ఖచ్చితమైన సమాచారంతో ఉగ్రవాద నెట్వర్క్లను లక్ష్యంగా చేసుకుంటున్నాయి.
లతీఫ్ భట్ను జమ్మూకశ్మీర్లో లష్కరే తోయిబాకు చెందిన చివరి క్రియాశీల స్థానిక ఉగ్రవాదిగా భద్రతా వర్గాలు పేర్కొంటున్నాయి. అతని హతం కేవలం ఒక వ్యక్తిని అంతమొందించడం కాదు.. స్థానిక ఉగ్రవాద వ్యవస్థను బలహీనపరిచే దిశగా సాగుతున్న సమగ్ర వ్యూహానికి ఇది ఒక కీలక ఘట్టం.
ఈ ఆపరేషన్ను భారత సైన్యం, జమ్మూకశ్మీర్ పోలీసులు, ఇంటెలిజెన్స్ బ్యూరో (IB), కేంద్ర రిజర్వ్ పోలీసు బలగం (CRPF) సంయుక్తంగా నిర్వహించడం విశేషం. గతంలో ఒక్కో సంస్థ ఒక్కో దిశలో పనిచేసే పరిస్థితి ఉండేది. ఇప్పుడు మాత్రం నిఘా సమాచారం సేకరణ నుంచి ఆపరేషన్ అమలు వరకు అన్ని సంస్థలు ఒకే కమాండ్ గ్రిడ్లో సమన్వయంతో పనిచేస్తున్నాయి. అదే ఈ ఆపరేషన్ విజయానికి ప్రధాన కారణంగా కనిపిస్తోంది.
ప్రస్తుతం సీఆర్పీఎఫ్ డైరెక్టర్ జనరల్ జి.పీ. సింగ్ నాయకత్వంలో ఈ బలగం జమ్మూకశ్మీర్ భద్రతా వ్యవస్థలో కీలక శక్తిగా ఎదుగుతోంది. భూస్థాయిలో నిఘా వ్యవస్థను మరింత పటిష్టం చేయడం, అనుమానితుల కదలికలను నిరంతరం పర్యవేక్షించడం, నిఘా సమాచారాన్ని వెంటనే కార్యాచరణగా మార్చడం వంటి అంశాల్లో సీఆర్పీఎఫ్ పాత్ర గణనీయంగా పెరిగింది. కుల్గాం ఆపరేషన్ ఈ మార్పుకు ప్రత్యక్ష ఉదాహరణగా నిలిచింది.
భారత్ ప్రస్తుతం అమలు చేస్తున్న ‘ప్రహార్ (PRAHAAR)’ వ్యూహం ఉగ్రవాదంపై మూడు ప్రధాన సూత్రాలైన ముందస్తు నిరోధం (Prevention), ఖచ్చితమైన లక్ష్య సాధన (Precision), నిరంతర ఒత్తిడి (Sustained Pressure) ఆధారంగా ముందుకు సాగుతోంది. ఈ విధానం ద్వారా ఉగ్రవాదులు దాడికి దిగేలోపే వారి నెట్వర్క్లు, ఆయుధ నిల్వలు, లాజిస్టిక్ వ్యవస్థలను నిర్వీర్యం చేసే ప్రయత్నాలు జరుగుతున్నాయి.
జమ్మూకశ్మీర్లో ఇప్పుడు ఉగ్రవాద వ్యతిరేక పోరు కేవలం ఎన్కౌంటర్లకే పరిమితం కావడం లేదు. ఇంటెలిజెన్స్, సాంకేతిక పరిజ్ఞానం, మానవ నిఘా, భూస్థాయి ఆపరేషన్లు అన్నీ సమన్వయంతో పనిచేస్తూ ఉగ్రవాద సంస్థల మూలాలను దెబ్బతీసే దిశగా అడుగులు వేస్తున్నాయి. దీంతో నెట్వర్క్ ఆధారిత ఉగ్రవాద కార్యకలాపాలు మాత్రమే కాకుండా, ఒంటరిగా దాడులకు పాల్పడే వ్యక్తుల (Lone Wolf Threats) కదలికలను కూడా ముందుగానే గుర్తించే సామర్థ్యం భద్రతా బలగాలకు పెరుగుతోంది.
దేశ భద్రతా వ్యవస్థలో జరుగుతున్న ఈ నిశ్శబ్ద మార్పు రాబోయే కాలంలో మరింత ప్రభావం చూపే అవకాశం ఉంది. భారత సైన్యం, సీఆర్పీఎఫ్, జమ్మూకశ్మీర్ పోలీసులు, నిఘా సంస్థల మధ్య పెరుగుతున్న సమన్వయం ఉగ్రవాదానికి వ్యతిరేకంగా మరింత సమర్థవంతమైన భద్రతా వలయాన్ని నిర్మిస్తోందని చెప్పడంలో ఎలాంటి సందేహం లేదు.








