గన్నేరువరం, కరీంనగర్ జిల్లా: పోలీస్ అమరవీరుల దినోత్సవ వారోత్సవాల సందర్భంగా గన్నేరువరం పోలీస్ స్టేషన్‌లో సోమవారం విజ్ఞాన్ హై స్కూల్ విద్యార్థుల కోసం ఓపెన్ హౌస్ కార్యక్రమాన్ని నిర్వహించారు. పోలీస్ వ్యవస్థ పనితీరుపై విద్యార్థులకు అవగాహన కల్పించేందుకు ఏర్పాటు చేసిన ఈ కార్యక్రమంలో గన్నేరువరం ఎస్సై జి. నరేందర్ రెడ్డి ముఖ్య అతిథిగా పాల్గొన్నారు.
ఈ సందర్భంగా ఎస్సై నరేందర్ రెడ్డి మాట్లాడుతూ, దేశ భద్రత, శాంతిభద్రతల పరిరక్షణ కోసం ప్రాణత్యాగం చేసిన పోలీస్ అమరవీరుల సేవలను స్మరించుకుంటూ ప్రతి ఏడాది అక్టోబర్ 21 నుంచి 31 వరకు పోలీస్ అమరవీరుల వారోత్సవాలు నిర్వహించడం ఆనవాయితీ అని తెలిపారు. అమరవీరుల త్యాగాలు నేటి తరానికి స్ఫూర్తిదాయకమని పేర్కొన్నారు.
అనంతరం విద్యార్థులకు పోలీస్ స్టేషన్‌లోని వివిధ విభాగాలను చూపించి, ఫిర్యాదుల స్వీకరణ విధానం, కేసుల నమోదు ప్రక్రియ, రికార్డుల నిర్వహణ, అత్యవసర పరిస్థితుల్లో ఉపయోగించే డయల్-112 సేవలు, బాడీ వోర్న్ కెమెరాల వినియోగం తదితర అంశాలను సులభంగా అర్థమయ్యేలా వివరించారు. పోలీస్ శాఖలో ఆధునిక సాంకేతిక పరిజ్ఞానాన్ని ఎలా వినియోగిస్తున్నారో కూడా విద్యార్థులకు తెలియజేశారు.
విద్యార్థులు చిన్ననాటి నుంచే క్రమశిక్షణ, బాధ్యతాయుతమైన జీవన విధానాన్ని అలవర్చుకోవాలని, చట్టాలపై అవగాహన పెంచుకోవడంతో పాటు సమాజానికి మంచి పౌరులుగా ఎదగాలని ఎస్సై సూచించారు. అలాగే మాదకద్రవ్యాలు, ఇతర చెడు వ్యసనాలకు దూరంగా ఉండాలని, ఎలాంటి సమస్య వచ్చినా పోలీసులను నిర్భయంగా ఆశ్రయించాలని సూచించారు.
కార్యక్రమం ముగింపులో విద్యార్థులు అడిగిన పలు ప్రశ్నలకు ఎస్సై సమాధానాలు ఇచ్చి వారి సందేహాలను నివృత్తి చేశారు. ఈ ఓపెన్ హౌస్ కార్యక్రమంలో పోలీస్ సిబ్బంది, విజ్ఞాన్ హై స్కూల్ ఉపాధ్యాయులు, విద్యార్థులు పాల్గొన్నారు.
