పాకాల : అధికారం, హోదా ఉన్నాయని అహంకారానికి తావివ్వకుండా.. తోటి మనిషి కష్టాన్ని గుర్తించి, ఆపదలో ఉన్నవారికి అండగా నిలవడమే నిజమైన మానవత్వమని పాకాల సబ్‌ రిజిస్ట్రార్ రహ్మతుల్లా తన సేవా దృక్పథంతో చాటుతున్నారు. విధి నిర్వహణకే పరిమితం కాకుండా, సమాజంలోని నిరుపేదలు, అనాథలు, అభాగ్యుల పట్ల ప్రత్యేక శ్రద్ధ చూపుతూ పలువురి ప్రశంసలు అందుకుంటున్నారు.
ప్రచార ఆర్భాటాలకు, ఫొటోలకు, ప్రశంసల కోసం చేసే హడావుడికి దూరంగా ఉంటూ తనవంతు సహాయాన్ని నిశ్శబ్దంగా అందించడం ఆయన ప్రత్యేకతగా నిలుస్తోంది. ఈ క్రమంలో పాకాల మండల పరిధిలోని ఓ అనాథ వ్యక్తి దీనస్థితిని గమనించిన రహ్మతుల్లా చలించిపోయారు. కనీస అవసరాలు తీర్చుకోలేని పరిస్థితిలో ఉన్న ఆ వ్యక్తికి స్వయంగా నూతన వస్త్రాలను అందజేసి మానవత్వాన్ని చాటుకున్నారు. కేవలం వస్త్రాలు అందించడమే కాకుండా, ఆపన్నుడికి అండగా ఉంటాననే భరోసా కల్పించారు.
సమాజంలో కొందరు హోదా, అధికారం, ఆడంబరాలకు ప్రాధాన్యత ఇస్తున్న తరుణంలో.. తోటి మనిషి కష్టాన్ని గుర్తించి స్పందించడం ద్వారా నిజమైన సేవాభావానికి అర్థం చెబుతున్నారు. పదవులు, హోదాలు తాత్కాలికమైనవని, మనం చేసే మంచి పనులే ప్రజల హృదయాల్లో చిరస్థాయిగా నిలిచిపోతాయని ఆయన ఆచరణలో చూపిస్తున్నారు.
అధికారం ఒక వ్యక్తికి ఉన్నతమైన స్థానాన్ని కల్పించవచ్చు.. కానీ మానవత్వం మాత్రమే ప్రజల హృదయాల్లో ప్రత్యేక స్థానాన్ని సంపాదించిపెడుతుంది. అనాథలు, నిరుపేదలు, అభాగ్యుల పట్ల రహ్మతుల్లా చూపుతున్న ఆదరణ సమాజానికి స్ఫూర్తిదాయకంగా నిలుస్తోంది.
ప్రభుత్వ అధికారులు విధి నిర్వహణతో పాటు సామాజిక బాధ్యతను కూడా గుర్తించి ఇలాంటి సేవా కార్యక్రమాలకు ముందుకు వస్తే ప్రభుత్వ యంత్రాంగంపై ప్రజల్లో మరింత విశ్వాసం పెరుగుతుందని స్థానికులు అభిప్రాయపడుతున్నారు. అధికారిగా తన బాధ్యతలను నిర్వర్తిస్తూనే, ఆపన్నులకు అండగా నిలుస్తున్న రహ్మతుల్లా సేవా దృక్పథాన్ని పలువురు అభినందిస్తున్నారు.
