జగిత్యాల జిల్లా, కోరుట్ల: కోరుట్ల పట్టణ చారిత్రక వారసత్వానికి ప్రతీకగా నిలిచిన గడి బురుజు స్థలాన్ని ఎట్టి పరిస్థితుల్లోనూ పరిరక్షిస్తామని కోరుట్ల ఎమ్మెల్యే డా. కల్వకుంట్ల సంజయ్ స్పష్టం చేశారు. గడి బురుజు స్థలాన్ని కొందరు ఆక్రమించేందుకు ప్రయత్నిస్తున్నారనే అంశంపై స్పందించిన ఆయన, ప్రజా ఆస్తులను కాపాడటం ప్రతి ఒక్కరి బాధ్యత అని పేర్కొన్నారు.
ప్రజలకు చెందిన స్థలాలను కబ్జా చేసే ప్రయత్నాలను సహించబోమని ఎమ్మెల్యే హెచ్చరించారు. గడి బురుజు స్థలానికి సంబంధించిన వీఎల్‌టీ (VLT) పూర్తిగా రద్దు అయ్యే వరకు తన పోరాటం కొనసాగుతుందని తెలిపారు. ప్రజా ప్రయోజనాల కోసం ఎంతటి పోరాటానికైనా సిద్ధంగా ఉన్నానని స్పష్టం చేశారు.
ఈ వ్యవహారంలో తమ పార్టీకి చెందిన నాయకులు లేదా కార్యకర్తల ప్రమేయం ఉన్నా ఎలాంటి ఉపేక్ష ఉండదని ఎమ్మెల్యే తేల్చిచెప్పారు. ప్రజా ఆస్తుల పరిరక్షణకు విరుద్ధంగా వ్యవహరించిన వారిపై కఠిన చర్యలు తీసుకుంటామని, అవసరమైతే పార్టీ నుంచి సస్పెండ్ చేయడానికీ వెనుకాడబోమని హెచ్చరించారు.
కోరుట్ల చరిత్రకు గుర్తింపుగా నిలిచిన గడి బురుజు స్థలాన్ని భవిష్యత్ తరాలకు అందించాల్సిన బాధ్యత ప్రతి పౌరుడిపైనా ఉందని ఆయన అన్నారు. ప్రజలకు చెందాల్సిన ఆస్తులను కాపాడేందుకు రాజకీయాలకు అతీతంగా అందరూ ముందుకు రావాలని పిలుపునిచ్చారు.
గడి బురుజు స్థల పరిరక్షణ కోసం ప్రారంభించిన ఈ ఉద్యమం కేవలం ఆరంభమేనని, ప్రజా ఆస్తుల విషయంలో వెనక్కి తగ్గే ప్రసక్తే లేదని ఎమ్మెల్యే డా. కల్వకుంట్ల సంజయ్ స్పష్టం చేశారు.
