మెదక్ / తూప్రాన్ : దసరా పండుగ సెలవుల నేపథ్యంలో ప్రజలు తమ స్వగ్రామాలకు, బంధువుల ఇళ్లకు వెళ్లే సమయంలో ఖాళీగా ఉండే ఇళ్లలో దొంగతనాలు జరగకుండా తగిన జాగ్రత్తలు తీసుకోవాలని మెదక్ జిల్లా ఎస్పీ డి.వి. శ్రీనివాసరావు సూచించారు. ప్రజల భద్రతకు ప్రాధాన్యమిస్తూ జిల్లా వ్యాప్తంగా పోలీస్ గస్తీని ముమ్మరం చేసినట్లు వెల్లడించారు.
దసరా పండుగను దృష్టిలో ఉంచుకుని నేరాల నియంత్రణకు ప్రత్యేక చర్యలు చేపట్టినట్లు ఎస్పీ తెలిపారు. ఇళ్లకు తాళాలు వేసి వెళ్లే సమయంలో అప్రమత్తంగా ఉండాలని, ముందస్తు భద్రతా చర్యలు తీసుకోవడం ద్వారా చోరీలను నివారించవచ్చని పేర్కొన్నారు.
ఇంటికి తాళం వేసే ముందు జాగ్రత్తలు
ప్రజలు ఇళ్ల నుంచి బయటకు వెళ్లే ముందు ప్రధాన ద్వారంతో పాటు వెనుక తలుపులు, కిటికీలు, బాల్కనీలను పూర్తిగా తనిఖీ చేయాలని ఎస్పీ సూచించారు. బంగారు ఆభరణాలు, నగదు, ఇతర విలువైన వస్తువులను ఇంట్లో ఉంచకుండా వీలైనంత వరకు బ్యాంకు లాకర్లలో భద్రపరచుకోవాలని కోరారు.
ఎక్కువ రోజుల పాటు ఇంట్లో ఎవరూ ఉండని సందర్భంలో నమ్మకమైన పొరుగువారికి సమాచారం అందించడంతో పాటు, స్థానిక పోలీస్ స్టేషన్‌కు కూడా తెలియజేయాలని సూచించారు. ఇంటి వద్ద ఏర్పాటు చేసిన సీసీటీవీ కెమెరాలు, భద్రతా అలారం వ్యవస్థలు సక్రమంగా పనిచేస్తున్నాయో లేదో ముందుగానే పరిశీలించుకోవాలని తెలిపారు.
సోషల్ మీడియాలో ప్రయాణ వివరాలు వెల్లడించొద్దు
ప్రజలు తమ ప్రయాణ వివరాలు, ఇంట్లో ఎవరూ లేని విషయాన్ని సామాజిక మాధ్యమాల్లో బహిరంగంగా వెల్లడించకూడదని ఎస్పీ హెచ్చరించారు. ఇంటి తాళాలను బయటకు కనిపించే ప్రదేశాల్లో ఉంచవద్దని సూచించారు.
అలాగే ఇంటి నుంచి బయలుదేరే ముందు అవసరం లేని విద్యుత్ పరికరాలను ఆఫ్ చేయాలని, గ్యాస్ సిలిండర్ రెగ్యులేటర్‌ను మూసివేయాలని తెలిపారు. ద్విచక్ర వాహనాలు, కార్లను సురక్షితమైన ప్రదేశాల్లో పార్క్ చేసి, హ్యాండిల్ లాక్‌తో పాటు ఇతర భద్రతా చర్యలు చేపట్టాలని కోరారు.
అనుమానాస్పద వ్యక్తులు కనిపిస్తే వెంటనే సమాచారం ఇవ్వండి
దసరా సెలవుల సమయంలో ఇళ్లలో చోరీలు, ద్విచక్ర వాహనాల దొంగతనాలు, చైన్ స్నాచింగ్ వంటి నేరాలను అరికట్టేందుకు పోలీస్ శాఖ అప్రమత్తంగా ఉంటుందని ఎస్పీ స్పష్టం చేశారు. కాలనీలు, వీధుల్లో అనుమానాస్పద వ్యక్తులు లేదా వాహనాల కదలికలు కనిపిస్తే వెంటనే స్థానిక పోలీసులకు సమాచారం అందించాలని సూచించారు.
అత్యవసర పరిస్థితుల్లో పోలీసుల సహాయం కోసం డయల్ 112కు ఫోన్ చేయాలని తెలిపారు.
ప్రజలు అప్రమత్తంగా ఉంటూ పోలీస్ శాఖ సూచించిన భద్రతా నియమాలను పాటించాలని, పోలీసులకు సహకరించి దసరా పండుగను ప్రశాంతంగా, సురక్షితంగా జరుపుకోవాలని మెదక్ జిల్లా ఎస్పీ డి.వి. శ్రీనివాసరావు విజ్ఞప్తి చేశారు.
