చిన్నశంకరంపేట, మెదక్ జిల్లా: మెదక్ జిల్లా చిన్నశంకరంపేట మండలంలోని సూరారం గ్రామంలో గుప్తనిధుల కోసం క్షుద్ర పూజలు నిర్వహిస్తున్నారనే అనుమానంతో గ్రామస్తులు తొమ్మిది మందిని పట్టుకుని పోలీసులకు అప్పగించిన ఘటన ఆదివారం అర్ధరాత్రి చోటుచేసుకుంది. ఈ ఘటన స్థానికంగా సంచలనం సృష్టించింది.
స్థానికుల సమాచారం మేరకు, వెల్దుర్తి మండలానికి చెందిన రామాయపల్లి గ్రామ సర్పంచ్ భర్త మహేందర్, ఆయన కుమారుడు, అలాగే హైదరాబాద్‌కు చెందిన మరికొందరు వ్యక్తులు సూరారం గ్రామ పరిసర ప్రాంతంలో గుప్తనిధుల కోసం క్షుద్ర పూజలు నిర్వహిస్తున్నట్లు గ్రామస్తులు గుర్తించారు. దీంతో అక్కడికి చేరుకున్న గ్రామస్తులు వారిని అడ్డుకుని పట్టుకున్నట్లు సమాచారం.
గ్రామస్తులు వారిని నిలదీసిన అనంతరం పోలీసులకు సమాచారం అందించగా, పోలీసులు సంఘటనా స్థలానికి చేరుకుని సంబంధిత వ్యక్తులను అదుపులోకి తీసుకుని పోలీస్ స్టేషన్‌కు తరలించినట్లు తెలిసింది.
ఈ ఘటనకు సంబంధించి గుప్తనిధుల కోసం క్షుద్ర పూజలు నిర్వహించారా? ఇతర కారణాలేమైనా ఉన్నాయా? అనే కోణాల్లో పోలీసులు దర్యాప్తు చేపట్టారు. అదుపులోకి తీసుకున్న వారి నుంచి వివరాలు సేకరిస్తూ ఘటన వెనుక ఉన్న పూర్తి వాస్తవాలను వెలికితీసే ప్రయత్నం చేస్తున్నారు.
పోలీసుల దర్యాప్తు పూర్తయిన అనంతరం ఈ ఘటనపై పూర్తి వివరాలు వెల్లడయ్యే అవకాశం ఉంది.
