కొమరం భీం ఆసిఫాబాద్ జిల్లా, కాగజ్‌నగర్: ప్రభుత్వ సేవల కోసం రైతు నుంచి లంచం డిమాండ్ చేసి, నగదు స్వీకరిస్తున్న సమయంలో ఓ అధికారి అవినీతి నిరోధక శాఖ (ఏసీబీ) అధికారులకు రెడ్ హ్యాండెడ్‌గా చిక్కిన ఘటన కాగజ్‌నగర్ తహసీల్దార్ కార్యాలయంలో చోటుచేసుకుంది. ఈ విషయాన్ని ఆదిలాబాద్ ఏసీబీ డీఎస్పీ జి. మధు మీడియాకు వెల్లడించారు.
ఏసీబీ తెలిపిన వివరాల ప్రకారం, మోసం గ్రామానికి చెందిన ఓ రైతు కుటుంబానికి చెందిన 18 ఎకరాల భూమి వారి తాతగారి పేరుపై నమోదై ఉంది. భూ రికార్డుల్లో ఉన్న పేరు ఆధార్ కార్డులోని పేరుతో సరిపోకపోవడంతో, పేరు మార్పు మరియు సక్సెషన్ (విరాసత్) నమోదు ప్రక్రియ పూర్తి చేయాల్సి వచ్చింది. ఈ పని చేయడానికి సంబంధిత అధికారి బి. శ్రీనివాస్ తొలుత రూ.50 వేల లంచం డిమాండ్ చేసినట్లు ఆరోపణలు ఉన్నాయి.
బాధిత రైతుతో జరిగిన బేరసారాల అనంతరం రూ.22 వేలకే ఒప్పందం కుదిరిందని ఏసీబీ అధికారులు తెలిపారు. అనంతరం రైతు ఫిర్యాదు మేరకు ఏసీబీ అధికారులు ఉచ్చుపన్ని, బాధితుడి నుంచి రూ.22 వేల లంచం స్వీకరిస్తున్న సమయంలో బి. శ్రీనివాస్‌ను రెడ్ హ్యాండెడ్‌గా పట్టుకున్నారు. లంచం మొత్తాన్ని స్వాధీనం చేసుకుని, అధికారిని అదుపులోకి తీసుకున్నట్లు అధికారులు వెల్లడించారు.
ఈ కేసులో ప్రస్తుతం ఆ ఒక్క అధికారే ప్రమేయం ఉన్నట్లు ప్రాథమిక దర్యాప్తులో తేలిందని ఏసీబీ వర్గాలు తెలిపాయి. కేసు నమోదు చేసి తదుపరి విచారణ కొనసాగిస్తున్నట్లు పేర్కొన్నారు.
లంచం అడిగితే వెంటనే ఫిర్యాదు చేయండి: ఏసీబీ
ఈ సందర్భంగా ఆదిలాబాద్ ఏసీబీ డీఎస్పీ జి. మధు ప్రజలకు కీలక సూచనలు చేశారు. ప్రభుత్వ ఉద్యోగులు తమ విధులు నిర్వహించేందుకు ఎవరైనా లంచం డిమాండ్ చేస్తే ప్రజలు భయపడకుండా వెంటనే ఏసీబీకి సమాచారం ఇవ్వాలని కోరారు. ఇందుకోసం ఏసీబీ టోల్ ఫ్రీ నంబర్ 1064 లేదా ఆదిలాబాద్ ఏసీబీ డీఎస్పీ ఫోన్ నంబర్ 9154388963కు ఫిర్యాదు చేయాలని విజ్ఞప్తి చేశారు. ప్రజల సహకారంతోనే అవినీతిని అరికట్టడం సాధ్యమవుతుందని ఆయన తెలిపారు.
