తిరుపతి : తిరుమల శ్రీవారి ఆలయంలో గురువారం దీపావళి పర్వదినం సందర్భంగా శాస్త్రోక్తంగా ఆస్థానం నిర్వహించారు. ఆలయ అర్చకులు, తిరుమల జీయర్లు, టీటీడీ ఉన్నతాధికారుల సమక్షంలో బంగారువాకిలి వద్ద ఆగమోక్తంగా ఆస్థాన వేడుకను నిర్వహించారు.
ఈ సందర్భంగా ఆలయ ఈవో జె శ్యామలరావు మీడియాతో మాట్లాడారు. శ్రీవారి ఆలయంలో దీపావళి పండుగ సందర్భంగా దీపావళి ఆస్థానాన్ని శాస్త్రోక్తంగా నిర్వహించినట్లు తెలిపారు. రాష్ట్రం సుభిక్షంగా ఉండాలని, ప్రజలందరూ సుఖసంతోషాలతో ఉండాలని స్వామివారిని ప్రార్ధించినట్లు చెప్పారు. ఈ దీపావళి ప్రజలందరి జీవితాల్లో వెలుగులు నింపాలని, ఆయురారోగ్య ఐశ్వర్యాలతో ఉండాలని ఈవో ఆకాంక్షించారు.
శ్రీవారి ఆలయ ప్రధాన అర్చకుల్లో ఒకరైన శ్రీవేణుగోపాల దీక్షితులు మాట్లాడుతూ భక్తులందరికీ శ్రీవారి ఆశీస్సులు అందాలని ఆకాంక్షిస్తూ దీపావళి ఆస్థానం నిర్వహించినట్లు తెలిపారు. ఈ సందర్భంగా స్వామివారి మూలవిరాట్టుకి, ఉత్సమమూర్తులకు నూతన పట్టువస్త్రాలు అలంకరించినట్లు చెప్పారు. తొలుత ఆలయంలో మూలమూర్తికి , ఉత్సవమూర్తులకు నూతన పట్టు వస్త్రాలు సమర్పించి రూపాయి హారతి, ప్రత్యేక హారతులను నివేదించారు.
