పల్నాడు జిల్లా – మాచర్ల: మాచర్ల మున్సిపాలిటీ ఏర్పడినప్పటి నుంచి సుమారు 40 ఏళ్లుగా ఎస్సీ మాదిగ సామాజిక వర్గానికి మున్సిపల్ చైర్మన్ పదవి దక్కలేదని మాదిగల రాజకీయ చైతన్య వేదిక ప్రతినిధులు ఆవేదన వ్యక్తం చేశారు. రాబోయే మున్సిపల్ ఎన్నికల్లో మాదిగ సామాజిక వర్గానికి చైర్మన్ పదవి కల్పించాలని ప్రధాన రాజకీయ పార్టీలను డిమాండ్ చేశారు. లేనిపక్షంలో స్వతంత్ర అభ్యర్థిని బరిలోకి దించి గెలిపించుకుంటామని హెచ్చరించారు.
ఎమ్మార్పీఎస్ ఆధ్వర్యంలో శనివారం మాచర్ల పట్టణంలోని అంబేద్కర్ పార్కులో నిర్వహించిన విలేకరుల సమావేశంలో మాదిగ రాజకీయ చైతన్య వేదిక ప్రతినిధులు మాట్లాడారు. తొలుత డాక్టర్ బి.ఆర్. అంబేద్కర్ విగ్రహానికి పూలమాలలు వేసి నివాళులర్పించారు. అనంతరం మాదిగ సామాజిక వర్గానికి రాజకీయ ప్రాతినిధ్యం, ఆత్మగౌరవం కల్పించాల్సిన అవసరాన్ని వివరించారు.
ఓటు బ్యాంకుగా కాకుండా రాజకీయ ప్రాతినిధ్యం కల్పించాలి
ఎన్నికలు వచ్చినప్పుడు మాదిగ సామాజిక వర్గాన్ని ఓటు బ్యాంకుగా ఉపయోగించుకుంటున్నారని, కీలక రాజకీయ పదవులు కల్పించే విషయంలో మాత్రం తగిన ప్రాధాన్యం ఇవ్వడం లేదని వేదిక ప్రతినిధులు ఆరోపించారు. మాచర్లలో మాదిగ సామాజిక వర్గానికి గణనీయమైన ఓటు బ్యాంకు ఉన్నప్పటికీ, మున్సిపల్ చైర్మన్ వంటి కీలక పదవులు ఎందుకు కల్పించడం లేదని ప్రశ్నించారు.
డబ్బు, మద్యం వంటి ప్రలోభాలతో ఓట్లు పొందేందుకు ప్రయత్నిస్తున్నారని ఆరోపిస్తూ, ఎన్నికల సమయంలో మాత్రమే తమ సామాజిక వర్గాన్ని గుర్తు చేసుకోవడం కాకుండా రాజకీయంగా ఎదిగేందుకు అవకాశాలు కల్పించాలని కోరారు. ఇతర సామాజిక వర్గాలకు అవకాశం కల్పించినట్లుగానే మాదిగలకు కూడా మున్సిపల్ చైర్మన్ పదవిని ఇచ్చే దిశగా ప్రధాన రాజకీయ పార్టీలు సానుకూల నిర్ణయం తీసుకోవాలని విజ్ఞప్తి చేశారు.
అవకాశం కల్పించకపోతే స్వతంత్ర అభ్యర్థి
రాబోయే మున్సిపల్ ఎన్నికల్లో రిజర్వేషన్లకు సంబంధం లేకుండా మాదిగ సామాజిక వర్గానికి చైర్మన్ పదవి కల్పించేలా రాజకీయ పార్టీలు ముందుకు రావాలని నాయకులు కోరారు. తమ డిమాండ్‌పై పార్టీలు స్పందించకపోతే ర్యాలీలు, ధర్నాలు నిర్వహిస్తామని స్పష్టం చేశారు. అవసరమైతే మాదిగల రాజకీయ చైతన్య వేదిక మద్దతుతో స్వతంత్ర అభ్యర్థిని పోటీలో నిలబెట్టి గెలిపించుకునేందుకు కృషి చేస్తామని అల్టిమేటం జారీ చేశారు.
డాక్టర్ బి.ఆర్. అంబేద్కర్ రచించిన రాజ్యాంగం అందించిన సామాజిక న్యాయం, సమానత్వ స్ఫూర్తికి అనుగుణంగా అణగారిన వర్గాలకు రాజకీయ ప్రాతినిధ్యం కల్పించాలని వారు పేర్కొన్నారు. మాదిగ సామాజిక వర్గానికి గుర్తింపు, గౌరవం కల్పిస్తూ ఉన్నత రాజకీయ పదవులు చేపట్టే అవకాశం ఇవ్వాలని అన్ని పార్టీల నాయకులను కోరారు.
పలువురు రాజకీయ నాయకుల సంఘీభావం
ఈ సమావేశంలో ఎమ్మార్పీఎస్ నియోజకవర్గ నాయకులు మాచర్ల రూబెన్ మాదిగ, మాచర్ల పట్టణ అధ్యక్షులు బొల్లెద్దుల మరి బాబు మాదిగ, మాజీ మున్సిపల్ చైర్మన్ మాచర్ల చిన్న యేసోబు, ఎంసీపీఐ రాష్ట్ర నాయకులు పోలేపల్లి అబ్రహం లింకన్, టీడీపీ నాయకులు మాచర్ల వాసు, పేరువాల పుల్లారావు, కంభంపాటి దానంబాబు, బీజేపీ నాయకులు ఆలేటి సామ్యేల్, వైఎస్సార్‌సీపీ నాయకులు వేల్పుల గురవయ్య, అల్లి జీవన్, కందుకూరి మధు, కోట రాజేష్, యలకపాటి రమేష్ బాబు తదితరులు పాల్గొన్నారు.
అనంతరం నాయకులు, కార్యకర్తలు చేతులు కలిపి మాదిగల ఐక్యత వర్ధిల్లాలంటూ, మాదిగలకు మున్సిపల్ చైర్మన్ పదవి కల్పించాలంటూ నినాదాలు చేస్తూ తమ సంఘీభావాన్ని ప్రకటించారు.
