తిరుపతి జిల్లా చంద్రగిరి నియోజకవర్గం పాకాల మండలం చంద్రగిరివారిపల్లి, ఎస్టి కాలనీ, వరదప్ప నాయుడుపేట, వల్లివేడు, ఇ-పాలగుట్టపల్లి పరిసర ప్రాంతాలలో సోమవారం రాత్రి ఏనుగులు గుంపు రైతుల పంట పొలాలను ధ్వంసం చేశాయి. చేతికొచ్చిన పంటలను ఏనుగులు ధ్వంసం చేయడంతో రైతులు తీవ్రంగా నష్టపోయారు. ఏనుగుల గుంపు ప్రజలు నివసిస్తున్న పరిసర గ్రామాలకు రావడంతో ప్రజలు తీవ్ర భయాందోళనకు గురవుతున్నారు. ముఖ్యంగా రైతులు పండించిన వరి పంట, మామిడి, పనస, టెంకాయ చెట్లను పూర్తిగా ధ్వంసం చేశాయి. తక్షణమే ప్రభుత్వం, ఫారెస్ట్ అధికారులు స్పందించి నష్టపోయిన పంటలను పరిశీలించి ప్రభుత్వం నుంచి రైతులకు నష్టపరిహారం కల్పించి ఆదుకోవాలని స్థానిక రైతులు కోరుతున్నారు. ప్రభుత్వ అధికారులు తక్షణమే స్పందించి ఏనుగుల గుంపు రైతుల పొలాల వైపు, పరిసర గ్రామాల వైపు రాకుండా చూడాలని స్థానిక ప్రజలు కోరుతున్నారు.
