కాకినాడ : కాకినాడ నగరపాలక సంస్థలో విలీనమైన ఎనిమిది గ్రామ ప్రాంతాలను కలుపుకొని కార్పొరేషన్ ఎన్నికలు నిర్వహించాలని డిమాండ్ చేస్తూ ప్రముఖ సామాజికవేత్త దూసర్లపూడి రమణరాజు శనివారం వినూత్న నిరసన చేపట్టారు. శరీరమంతా బ్యాండేజీలు కట్టుకొని, చేతిలో ప్లకార్డు పట్టుకుని వీల్‌చైర్‌లో కూర్చొని నిరసన యాత్ర నిర్వహించారు. విలీన గ్రామాల్లో స్థానిక పాలన, మౌలిక సదుపాయాల సమస్యలను ప్రభుత్వ నేతల దృష్టికి తీసుకెళ్లడమే ఈ కార్యక్రమం ఉద్దేశమని ఆయన తెలిపారు.
తూరంగి, ఇంద్రపాలెం, వాకలపూడి, వలసపాకల, చీడిగ, రమణయ్యపేట, స్వామినగర్, ఎస్‌. అచ్యుతాపురం, గంగనాపల్లి ప్రాంతాలకు సంబంధించిన విలీన సమస్యలను పరిష్కరించాలని ఆయన డిమాండ్ చేశారు. ముఖ్యంగా 42, 48 డివిజన్ల పరిధిలోని ప్రాంతాలకు సంబంధించి ఎన్నికల నిర్వహణ, డివిజన్ల విభజనపై ప్రభుత్వం స్పష్టత ఇవ్వాలని కోరారు.
ఎన్నికలు లేకుండా స్థానిక పాలన ఎలా?
కాకినాడ కార్పొరేషన్‌కు గతంలోనూ, ప్రస్తుతం కూడా ఎన్నికల నిర్వహణలో జాప్యం చోటుచేసుకుందని రమణరాజు ఆందోళన వ్యక్తం చేశారు. 2010 నుంచి 2016 వరకు, అలాగే 2022 నుంచి ఇప్పటివరకు ఎన్నికలకు సంబంధించిన సమస్యలు కొనసాగుతున్నాయని పేర్కొన్నారు. ఎన్నికల జాప్యం కారణంగా స్థానిక అభివృద్ధి, నిధుల వినియోగంపై ప్రభావం పడుతోందని ఆరోపించారు.
కార్పొరేషన్ పరిధిలోని ప్రాంతాలకు పన్నులు వసూలు చేస్తూ, ప్రజలకు ఎన్నికల ద్వారా తమ ప్రతినిధులను ఎన్నుకునే అవకాశం కల్పించకపోవడం సమంజసం కాదని అన్నారు. స్థానిక ప్రజలకు ప్రాతినిధ్యం కల్పించడంతో పాటు, పాలనాపరమైన సమస్యలను పరిష్కరించేందుకు ప్రభుత్వం తక్షణ చర్యలు తీసుకోవాలని కోరారు.
మౌలిక సదుపాయాలు కల్పించాలని డిమాండ్
విలీన గ్రామాల్లో తాగునీటి సరఫరా, మురుగునీటి పారుదల, రహదారులు, డ్రైనేజీ వంటి మౌలిక సదుపాయాలు మెరుగుపడాల్సిన అవసరం ఉందని రమణరాజు పేర్కొన్నారు. పారిశ్రామిక అభివృద్ధికి అనుగుణంగా పౌర సదుపాయాలు కల్పించడంలో అధికారులు మరింత శ్రద్ధ చూపాలని కోరారు.
స్థానిక పాలనకు సంబంధించిన సమస్యలు పరిష్కారం కాకపోవడంతో గ్రామీణ, పట్టణ సదుపాయాల మధ్య అంతరం పెరుగుతోందని ఆయన అభిప్రాయపడ్డారు. విలీన గ్రామాల ప్రజలకు తగిన మౌలిక సదుపాయాలు, అభివృద్ధి కార్యక్రమాలు అందేలా ప్రత్యేక కార్యాచరణ చేపట్టాలని డిమాండ్ చేశారు.
హైకోర్టు పరిధిలో ఉన్న సమస్యపై చర్యలు తీసుకోవాలి
విలీన గ్రామాల సమస్యపై రాజ్యాంగంలోని ఆర్టికల్ 226 కింద న్యాయపరమైన చర్యలు తీసుకునే అంశాన్ని ప్రస్తావించిన రమణరాజు, డివిజన్ల విభజనకు సంబంధించి కొత్త గెజిట్ నోటిఫికేషన్ విడుదల చేయాలని కోరారు. పంచాయతీరాజ్ శాఖకు సంబంధించిన తుది నివేదిక, అడ్వకేట్ జనరల్ నివేదిక, ప్రభుత్వ ఉత్తర్వుల ప్రక్రియను పూర్తి చేయాలని విజ్ఞప్తి చేశారు.
విలీన గ్రామాల అంశంపై కోర్టులో ఉన్న అభ్యంతరాలు, స్టే ఉత్తర్వులు, డివిజన్ల విభజన సమస్యలను చట్టపరంగా పరిష్కరించిన తర్వాతే ఎన్నికల నిర్వహణపై స్పష్టత రావాలని ఆయన అభిప్రాయపడ్డారు. ఈ అంశంపై ముఖ్యమంత్రి కార్యాలయ అధికారులు, సంబంధిత ప్రిన్సిపల్ సెక్రటరీని కలిసి వివరణ కోరనున్నట్లు తెలిపారు. స్పందన రాకపోతే హైకోర్టు ధర్మాసనం ముందు సమస్యను ప్రస్తావిస్తానని పేర్కొన్నారు.
ఎనిమిది గ్రామాలతోనే ఎన్నికలు జరపాలి
కాకినాడ కార్పొరేషన్ ఎన్నికలను ఎనిమిది విలీన గ్రామ ప్రాంతాలతో కలిపి నిర్వహిస్తారా? లేక వేర్వేరుగా నిర్వహిస్తారా? అనే అంశంపై ప్రభుత్వం స్పష్టమైన ప్రకటన చేయాలని రమణరాజు డిమాండ్ చేశారు. వివిధ ప్రభుత్వ శాఖలు సమన్వయంతో వ్యవహరించి, దీర్ఘకాలంగా కొనసాగుతున్న సమస్యకు పరిష్కారం చూపాలని కోరారు.
విలీన గ్రామాల ప్రజలకు ప్రజాస్వామ్యబద్ధమైన స్థానిక పాలన అందించడమే తన ఉద్యమ లక్ష్యమని స్పష్టం చేశారు. ఎనిమిది గ్రామాల సమస్య పరిష్కారమై, వాటిని కలుపుకొని కాకినాడ కార్పొరేషన్ ఎన్నికలు నిర్వహించే వరకు తన పోరాటాన్ని కొనసాగిస్తానని రమణరాజు ధీమా వ్యక్తం చేశారు.
